«Պրիզմա» ՍՊԸ-ի փորձագիտական թիմը, UNICEF-ի աջակցությամբ և Հայաստանի աշխատանքի և սոցիալական հարցերի նախարարության հետ սերտ համագործակցությամբ, մշակել է Երեխաների իրավունքների պաշտպանության 2024-2029 թվականների համալիր ծրագիրը։ Ծրագիրը սահմանում է երեխաների իրավունքների պաշտպանության ոլորտում պետական քաղաքականության հիմնական առաջնահերթությունները՝ նպատակ ունենալով ստեղծել հավասար պայմաններ բոլոր երեխաների իրավունքների լիարժեք իրացման համար և ապահովել նրանց ներդաշնակ զարգացումը։
Համալիր ծրագիրը հիմնված է մարդկային կապիտալի լիարժեք և ներդաշնակ զարգացման համընդհանուր տեսլականի վրա՝ սահմանելով հստակ նպատակներ և միջոցառումներ, ինչպես նաև ապահովելով համապատասխան բյուջետային հատկացումներ՝ ծրագրի արդյունավետ իրականացման համար։
Համալիր ծրագիրը ինտեգրված մոտեցմամբ անդրադառնում է հասարակական կյանքի բոլոր ոլորտներին՝ առանձնահատուկ շեշտադրելով 0-18 տարեկան երեխաների իրավունքների պաշտպանության առանձնահատկությունները։
Ծրագրի նպատակների և ակնկալվող արդյունքների սահմանման ընթացքում հաշվի են առնվել պետական և տեղական ինքնակառավարման մարմինների կողմից մշակված այլ ռազմավարական փաստաթղթերում և ոլորտային ծրագրերում արդեն իսկ ներառված միջոցառումները, սակայն կրկնությունից խուսափելու նպատակով դրանք ծրագրում առանձին չեն ընդգրկվել։
Համալիր ծրագրում ներառված է ընդհանուր 91 միջոցառում, որոնք ուղղված են 138 ակնկալվող արդյունքի ապահովմանը, նպաստելով երեխաների իրավունքների պաշտպանության և զարգացման նպատակային և կառուցվածքային իրականացմանը։
Client
UNICEF Հայաստան
Date
Մայիս 2024 - Փետրվար 2025
