«Պրիզմա» ՍՊԸ-ի փորձագիտական թիմն իրականացրել է «HoT Ակադեմիա» ծրագրի վերջնական գնահատումը։ Վերջինս իրականացվել է «Զարգացման սկզբունքներ» հասարակական կազմակերպության կողմից և պատվիրակվել է «Հույսի նշան» կազմակերպության կողմից: Գնահատման նպատակն էր ապահովել «Զարգացման սկզբունքներ»-ի ծրագրի համակարգված և անաչառ գնահատում, որը կնպաստեր երիտասարդների զբաղվածության և ձեռնարկատիրության խթանմանը հյուրընկալության և հարակից ոլորտներում՝ Տավուշի և Գեղարքունիքի մարզերում:
Գնահատումը տրամադրել է ծրագրի իրականացման և արդյունքների համապարփակ վերլուծություն՝ ներկայացնելով գործնական առաջարկություններ արդյունքների կայունությունն ապահովելու համար, բացահայտելով քաղված դասերը և տրամադրելով արժեքավոր պատկերացումներ ապագա նախաձեռնությունների համար: Հիմնվելով ՏՀԶԿ ԶՀԿ/OECD DAC չափանիշների վրա՝ գնահատումն ուսումնասիրել է ծրագրի համապատասխանությունը, արդյունավետությունը, ազդեցությունը, համաձայնեցվածությունը, կայունությունը և միջոլորտային հարցերը:
Տվյալների հավաքագրման համար կիրառվել է որակական մոտեցում, հիմնական տվյալները հավաքագրվել են առանցքային տեղեկատվատուների հետ հարցազրույցների, ֆոկուս խմբային քննարկումների և փոքր խմբային քննարկումների միջոցով: Երկրորդական տվյալները ստացվել են փաստաթղթերի վերլուծության միջոցով:
Թիրախային խումբը կազմել են 16-35 տարեկան երիտասարդները Տավուշի և Գեղարքունիքի մարզերից:
