«Պրիզմա» ՍՊԸ-ի փորձագիտական թիմն իրականացրել է «Հայաստանի թափոնների քաղաքականություն» ծրագրի միջնաժամկետ գնահատումը, որը ֆինանսավորվում է Շվեդիայի միջազգային զարգացման համագործակցության գործակալության (SIDA) կողմից և իրականացվում է Հայաստանի Ամերիկյան Համալսարանի (ՀԱՀ) Յակուբյան բնապահպանական կենտրոնի կողմից: Այս չորսամյա ծրագիրը նպատակ ունի բարելավել Հայաստանի թափոնների կառավարման ոլորտը՝ հզորացնելով ոլորտի կարողությունները և կիրառելով շրջակա միջավայրի համար անվտանգ թափոնների կառավարման քաղաքականություն:
Միջնաժամկետ գնահատման նպատակն էր գնահատել հաշվետու ժամանակահատվածում ծրագրի արդյունքների ուղղությամբ կատարված առաջընթացը և տրամադրել տեղեկատվություն ծրագրի իրականացման ճշգրտումների և բարելավումների վերաբերյալ:
Գնահատման շրջանակը համատեղել է ՏՀԶԿ/ԶՀԿ/ OECD/DAC չափանիշները շուկայի համակարգերի գնահատման մոտեցման հետ՝ ապահովելով համապարփակ և համատեքստային գնահատում: Գնահատման չափանիշներն էին՝ համապատասխանություն և նպատակահարմարություն, արդյունավետություն և ազդեցություն (ծավալ և կայունություն), հնարավոր կայունություն, միջոլորտային հարցեր, քաղված դասեր և առաջարկություններ:
Այս միջնաժամկետ գնահատման համար կիրառվել է տեսության վրա հիմնված գնահատման մոտեցումը, որը հնարավորություն է տվել համապարփակ գնահատել ինչպես ծրագրի ուղղակի ազդեցությունը, այնպես էլ դրա ներդրումն ավելի լայն համակարգային փոփոխությունների և դրանցից բխող հետագա ազդեցության կոնտեքստում: Նպաստող գործոնների վերլուծությունն ընտրվել է որպես հիմնական վերլուծական մեթոդ այս միջնաժամկետ գնահատման համար:
Միջնաժամկետ գնահատումը կատարվել է խառը մեթոդների օգտագործմամբ՝ կիրառելով որակական և քանակական մեթոդաբանություններ: Հիմնական տվյալները հավաքագրվել են հարցման (հանրապետական հարցում/ընտրանքի չափը՝ 623, շահակիցների հարցում/ընտրանքի չափը՝ 46), առանցքային տեղեկատուների հետ հարցազրույցների (12 հարցազրույց ծրագրի փորձագետների, շահակիցների, դոնորների ներկայացուցիչների հետ) և ֆոկուս խմբային քննարկման (մեկ քննարկում ծրագրի թիմի հետ) մեթոդներով: Երկրորդական տվյալները հավաքագրվել են փաստաթղթերի վերլուծության միջոցով:
RAG (կարմիր-նարնջագույն-կանաչ) մոտեցումը կիրառվել է գնահատման արդյունքները վիզուալացնելու և ծրագրի կատարողականը և առաջընթացը գնահատելու համար:
